واحده حبت تعمل لزوجها مفاجأه رومانسيه وهو راجع من الشغل تعبان عملت ايه ؟ وضبت جلسه جميله رومانسيه وطلبت بيتزا وكيكه جاهزه وجابت شموع وعصير وطفت النور وصارت على اضواء الشموع ياسلام احلى حاجه. المهم شوفوا الموقف حصل ازاي بين الاتنين اول شئ الزوج دخل من بره لقى الظلام والشموع منوره تعالوا نشوف رد فعله كان ايه:
الزوج : (ترررررررررك ده صوت الباب ودخل ) ايده ايده هي الدنيا ضلمه كده ليه هو النور قطع ؟
الزوجه : ( اتصدمت ) لا يا حبيبي انا عملالك مفاجأه ايه رايك نتعشى في ضوء الشموع ؟
الزوج : الله ده في عشا كويس طب شغلي النور عشان نعرف ناكل .
الزوجه : ( هاتولع من الغيظ ) شغلت النور .معقول ماخدش باله ؟
الزوج :ايه اللي انتي عملاه ده طفي طفي الشموع ده يا شيخه وفريها لما النور يقطع .
الزوجه : ( اللهم طولك يا روح ) حاضر يا حبيبي ( تقول العباره وهي نفسها تخبطه بأي حاجه) ضيع فرحتها المسكينه
الزوج : يا نهار الوان ايده اللي انتي عملاه ده جايبه بيتزا الحجم الكبير ليييييييييه هو تبذير ؟ ودفعتي فيها كام انشاءالله طبعا ضيعتي مصروف البيت على الكلام الفارغ ده ده بدل ما كنتي تتشمللي وتدخلي المطبخ وتعمليها بايدك على الاقل كنتي وفرتي؟ ياله زي بعضه هاتي السكينه خلينا نقسمها نشيلها لوقت عوزه .
الزوجه : ( ولعت مش قادره تستحمل ) . وبتقول في سرها ( نشيلها ؟ شكلي انا اللي هاتشل !!!)
الزوج : اكل وشبع الحمدلله قام غسل ايده وراااااااح ينام .وماتكلمش ولا كلمه على الاكل
الزوجه معجبهاش الحال راحت وراه) ايه يا حبيبي ( بتقولها بغيظ ) انت مش هاتقعد معايا شويه ولا ايه احكيلي عملت ايه النهارده مش واخد بالك من الفستان الجديد اللي انا لابساه ؟ ده اللون اللي انت بتحبه .
الزوج : (اتصدم ونظر نظره غرييبه للفستان من فوق لتحت ) والله ؟ انتي كمان جبتي فستان ؟ انتي مش ناويه تجبيها لبر وقال عماله تقوليلي انا مدبرة ممتازه بعرف اوفر اديكي يا فالحه بعزقتي القرشين اللي حليتنا في الشهر يعني اعمل فيكي ايه حرام عليكي .
الزوجه : جالها تخلف عقلي وجنان واتهبلت من اللي شافته يا حرام وخدوا عندكوا بقى حاجه زي كده كل يوم مافيش اي استجابه من اي نوع .
وده كانت يوميات زوج خنيق وزوجه مغلوبه على امرها .
ده كانت حاجه بسيطه ارجو انها تنال اعجابكم وربنا يهدي الناس كلها على بعضها